Gjykata Kushtetuese e Kosovës javën e ardhshme do ta publikojë vendimin për ndryshimet kushtetuese. Sipas asaj që raporton Gazeta Express, kjo gjykatë pritet të konstatojë se shkurtimi i mandatit të Presidentes aktuale është në kundërshtim me Kushtetutën. Kështu, Atifete Jahjaga mbetet në Presidencë deri në vitin 2016.

Në javën e tretë të këtij muaji, Gjykata Kushtetuese do të konfirmojë qëndrimin e Atifete Jahjagës se shkurtimi i mandatit të saj, përmes ndryshimeve kushtetuese, është në kundërshtim me dokumentin më të lartë juridik të shtetit.

Burime të Expressit brenda Gjykatës kanë treguar se argumentet e Presidentes për jokushtetutshmërinë e shkurtimit të mandatit të saj, qëndrojnë plotësisht.

Jahjaga ka përmendur tri argumente dhe tri nene të Kushtetutës që e pamundësojnë largimin e saj nga Presidenca deri në përfundimin e mandatit pesëvjeçar.

Në shkresën të publikuar nga e përditshmja "Express", të shtunën, thuhet se Amendamenti i Dhjetë që parasheh përfundimin e mandatit është në kundërshtim me Nenin 24, 45 dhe 91 të Kushtetutës. /albeu.com/