Presidentja e Kosovës, Atifete Jahjaga është shprehur se shteti i Kosovës do ta luftojë fort radikalizmin dhe se nuk do të tolerojë aspak rrezikimin e mundshëm të sigurisë kombëtare.

Jahjaga tha se Kosova është një shtet që i ka të sanksionuara me ligj fjalët që krijojnë mosdurim kombëtar dhe në rast se konstatohen të tilla, ligji do të veprojë.

Sipas saj, arrestimet e imamëve bëhen që të hetohet çdo rast, me qëllim që mos të vihet në dyshim siguria kombëtare dhe që "shteti i Kosovës të jetë shtet i lirisë, i sigurisë, tolerancës dhe i harmonisë fetare".

Presidentja vlerësoi se institucionet e Kosovës e kuptojnë seriozisht përgjegjësinë për të vepruar ndaj kësaj kanosjeje globale në përputhje me vullnetin dhe përcaktimin e qytetarëve të Kosovës për ndërtimin e një vendi tolerant dhe kontribuues të stabilitetit e sigurisë kolektive. /albeu.com/