Jahjaga dënon shkruarjen e grafitit në Manastirin e Deçanit
Dioqeza e Rashkë-Prizrenit ka deklaruar se në dyert e Manastirit të Deçanit, mëngjesin e sotëm është shfaqur një grafit i UÇK-së. Ndaj këtij grafiti ka reaguar edhe presidentja e Kosovës Atifete Jahjaga.

Presidentja Jahjaga ka dënuar fuqishëm shkruarjen e grafitit në Manastir të Deçanit, i cili është një monument fetar dhe një prej simboleve të trashëgimisë kulturore të Kosovës, ndaj të cilës qytetarët dhe institucionet e Kosovës kanë treguar përkujdesje të veçantë.

Zyra e presidentes përmes një kumtese thekson se dëmtimi i monumenteve fetare paraqet një akt të papranueshëm dhe në kundërshtim të plotë me traditat e vlerat e qytetarëve të Kosovës, të mbështetura në tolerancë dhe respekt të plotë për komunitetet fetare dhe monumentet e tyre, të vilat mbështeten edhe nga Kushtetuta e Republikës së Kosovës.

Presidentja Jahjaga u ka bërë thirrje mekanizmave të sigurisë që të zbulojnë autorët e këtij akti të shëmtuar dhe t’i nxjerrin ata përpara drejtësisë. /albeu.com/
Shtuar më 25/04/2014, ora 15:20

Shkruani komentin tuaj!
Të fundit nga kjo kategori