Ja familja e Ideal Bytyçit, fëmijës së parë për vitin 2016 në Itali
Ideal Bytyçi, fëmija i parë i çiftit të ri me orgjinë nga Kosova, preku i pari 2016-n në Breshia të Italisë.

Ai erdhi në jetë në orën 1.42 minuta të mëngjesit të 1 janarit në spitalin Mellino di Chiari.

“Ne jemi me origjinë kosovare, por jetojmë prej kohësh në Itali. Me Idealin, gjithçka shkoi mirë, si gjatë shtatzanisë ashtu edhe gjatë lindjes, por ne nuk e kishim pritur një vëmendje të tillë nga mediat. Kjo është shenjë e mirë, ndoshta e ardhmja për të voglin tonë ruan surpriza të mëdha,” është shprehur i ati i vogëlushit, Yber Bytyçi, 31 vjeç.

Më tej Yberi rrëfen: “Unë punoj si murator, një punë jo e lehtë, duke parë që kriza ka goditur vendin edhe në këtë sektor. Dëshira më e madhe për këtë vit të ri, është të shoh djalin tim të shëndetshëm, dhe për mua që t’i kthehem punës që të siguroj një të ardhme më të mirë për djalin dhe familjen time”.

Ndërsa Dafina, nëna 21-vjeçare e Idealit, duke pasur parasysh mungesën e vendeve të punës, kujdeset për shtëpiat e të tjerëve.

Tani me lindjen e fëmijës së parë, do t’i duhet t’i shtojë angazhimeve të saj përkujdesjen ndaj të sapolindurit.

Ideali lindi 3.6 kg dhe gëzon shëndet të plotë. Pas Idealit lindën dhe dy vajza italiane Marta (03:05) dhe Amelia (04:30).
Shtuar më 02/01/2016, ora 19:30

Shkruani komentin tuaj!
Të fundit nga kjo kategori