Ministri i Punëve të Jashtme i Kosovës, Enver Hoxhaj, ka pritur të mërkurën në takim ministrin e Punëve të Jashtme të Mbretërisë së Holandës, Frans Timmermans, i cili po qëndron për vizitë zyrtare në Republikën e Kosovës.

Hoxhaj ka shprehur mirënjohjen e qytetarëve dhe Qeverisë së Kosovës për mbështetjen që Holanda ka dhënë për Kosovën në dekadat e fundit.

Hoxhaj u shpreh se Kosova është një histori suksesi dhe Holanda ka ndihmuar në ndërtimin e shtetit. Një tjetër çështje që është diskutuar në takim, ka qenë e ardhmja evropiane e vendit. Timmermans tha se Holanda është e angazhuar për partneritet me Kosovën, duke shprehur besimin se vendi e ka të ardhmen në BE.

"Unë besoj se shqiptarët e Kosovës, kanë të drejta të njëjta që të jenë evropianë me të drejta të plota si holandezët dhe popujt e tjerë të Evropës dhe do ta arrijmë atë objektiv. Ne jemi të gatshëm që të ndihmojmë që ai objektiv të jetë i arritshëm për të gjithë",-tha ministri Timmermans. /albeu.com/