Hahn: Mbështesim çdo zgjidhje nga Thaçi dhe Vuçiçi
Komisioneri evropian për Zgjerim, Johannes Hahn ka thënë se nëse zgjidhja nënkupton ndryshim kufijsh, atëherë duhet të jepen garanci që nuk do të këtë efekt në vende tjera.

Këtë deklaratë Hahn e bëri në fjalimin e mbajtur sonte në panelin e Forumit të Alpbach.

“I takon Vuçiçit dhe Thaçit që ta gjejnë një zgjidhje. Ne nuk do të imponojmë asgjë nga jashtë. Ama e përsëris se çfarëdo zgjidhje që gjendet, duhet të jetë e përshtatshme dhe që i kontribuon stabilitetit rajonal e jo të shkaktojë jostabilitet diku tjetër. Duhet ta marrim këtë garanci prej tyre. E duartrokas angazhimin e Vuçiçit dhe Thaçit. Në radhë të parë zgjidhja duhet të vijë nga ata. Por, patjetër duhet t’i kontribuojë paqes dhe stabilitetit në tërë rajonin. Kjo do të jetë e rëndësishme për BE-në”, tha Hahn.

Hahn ka thënë se Prishtina dhe Beogradi duhet mbështetur që ata ta arrijnë një marrëveshje.

“Ne që jemi jashtë, nuk do të ishte e mençur që të intervenojmë në një formë ose në një tjetër. Ne duhet t’ua lëmë atyre por duhet të ju japim çdo mbështetje për ta gjetur një zgjidhje”, ka thënë komisioneri Hahn.

Kjo është deklarata e parë e një zyrtari të BE-se në lidhje me mundësinë e ndryshimit të kufijve në mes Kosovës dhe Serbisë.
Shtuar më 26/08/2018, ora 08:38
Shkruani komentin tuaj!
Të fundit nga kjo kategori