Gënjeshtër, Demaj nuk punon në ministri si drejtor për Vatikanin që nuk e njeh Kosovën
Një “Drejtor i Departamentit për bashkëpunim me Vatikanin” që u emërua të enjten në Prishtinë, nuk ka detyrë zyrtare nga Qeveria e Kosovës.

Emanuel Demaj në këtë detyrë u emërua nga një Organizatë Joqeveritare në Prishtinë. Për më tepër, Departamenti për Bashkëpunim me Vatikanin as që ekziston në kuadër të Qeverisë së Kosovës.

Emërimi i ish-ushtruesit të detyrës së Ministrit të Jashtëm Emanuel Demaj si drejtor i Departamentit për bashkëpunim me Vatikanin po del të mos jetë i vërtetë.

Në fakt, ky emërim është bërë nga një OJQ në Prishtinë. Por, pozita s’ka të bëjë me Qeverinë e Kosovës, gjegjësisht Ministrinë e Punëve të Jashtme.

Thjeshtë, ai këtë pozitë e ka marrë nga organizata joqeveritare IAMN - Instituti për Afirmimin e Marrëdhënieve Ndëretnike.

Qeveria e Kosovës, për raportet me Vatikanin e ka të ngarkuar zëvendësministrin e Jashtëm Anton Beirsha.

Ky i fundit, të premten ka mohuar të jetë krijuar një departament i tillë në MPJ, rrjedhimisht as ndonjë person në krye të saj.

“Nuk kam emëruar asnjë person me këtë detyrë”, tha Berisha për Gazetën Express.
Ai shton se as nuk është në plan krijimi i një departamenti të tillë, pasi sipas tij zyra e tij është e ngarkuar nga qeveria për raportet e Kosovës me Vatikanin.

“Kjo teme shume e rëndësishme dhe me interes për Kosovën trajtohet nga qeveria përkatësisht Ministria e Punëve të Jashtme me seriozitetin maksimal”, thotë zëvendësministri Berisha.

Ndryshe, përderisa në media të enjten është raportuar se detyra e Emanuel Demajt është pozitë qeveritare, vetë ish-zëvendësministri i jashtëm në profilin e tij në facebook ka treguar se detyra me të cilën është ngarkuar është vetëm brenda një OJQ-institut që deri dje ishte e padëgjuar më parë.

Nga ana tjetër, Vatikani vazhdon të mos e njoh pavarësinë e Kosovës të shpallur më 17 shkurt 2018. Qëndrimi i vendit ku ndodhet selia e shenjtë e Krishterëve të të gjithë botës nuk është arritur të ndryshohet përkundër se ati i shenjtë Papa Françesku të paktën dy herë e ka pritur në Vatikan presidentin Hashim Thaçi.

Muaj më parë në Selinë e Shenjtë të Papës, në Vatikan, është pritur edhe Kryeministri Ramush Haradinaj, i shoqëruar nga zëvendësministri i jashtëm Anton Berisha.


Shtuar më 26/07/2018, ora 16:51

Shkruani komentin tuaj!
Të fundit nga kjo kategori