Qendra për Hulumtim, Dokumentin dhe Publikim publikoi sot të dhënat e projektit hulumtues: Vlerësimi i nevojave të viktimave në Kosovë - Koha për t’u ndalë e për të dëgjuar.


Ky hulumtim studion nevojat dhe sfidat e familjeve të viktimave dhe personave të zhdukur, duke ekzaminuar barrierat e procesit të rindërtimit të besimit qytetar ndërmjet familjeve të viktimave dhe personave të zhdukur, dhe institucioneve të shtetit, si dhe vlerësimin e parakushteve për integrimin e tyre në shoqëri.


Pengesat më të mëdha që potencohen në raport ishin drejtëpërdrejt të lidhura me varfërinë. Siguria ekonomike, nevojat shëndetësore, drejtësia, njohja e sakrificës ishin tema të cilat prekin më së shumti familjarët. Ajo që ndihmonte në përballjen me barrën financiare, ishte shpresa që së paku të ishin në gjendje të përmirësonin cilësinë e jetës për fëmijët e tyre.



Me këtë rast, Bajram Qerkinaj nga shoqata Zëri i Prindërve në Mitrovicë potencoi që duhet të punohet edhe më shumë në gjetjen e trupave të personave të zhdukur. Vetë baba që ende nuk e di fatin e djalit të zhdukur gjatë 1999-tës, ai tha që barra më e madhe e kërkimit po u bie vetë familjarëve të viktimave. Ai theksoi që institucionet shtetërore duhet të sigurojnë të ardhmen e fëmijëve që kanë mbetur pa prindërit tyre./albeu.com/