Në një qendër votimi në Rrogozhinë është ndërprerë procesi i votimit. Shkak është bërë fotografimi i votës në dy raste.
Pavarësisht këtij episodi, KQZ-ja në të dhënat e saj thotë se pjesëmarrja e votuesve është e lartë.
Në dy orët e para numri i pjesëmarrësve ka shkuar mbi 5%, shifër kjo shumë herë më e lartë krahasur me procesin e 14 majit.
Në Rrogozhinë janë 54 qendra votimi, në të cilat, 32 mijë e 826 qytetarë po u drejtohen qendrave të votimit dhe ndryshe nga 14 maji, do të kenë vetëm një fletë votimi, atë për kryebashkiakun, ku po njëjtë si në zgjedhjet vendore, i pari në fletën e votimit është i renditur kandidati socialist Edison Memolla dhe numrin 2 e mban Shkëlqim Hoxha.
Shpresat për këtë të fundit janë shtuar, pasi në këto zgjedhje nuk do të votojnë të burgosurit, që në zgjedhjet e fundit vulosën fitoren e Edison Memollës. Në zgjedhjet e 14 majit, në Rrogozhinë morën pjesë në votime rreth 11 mijë votues, por me ankesë të koalicioni “Bashkë Fitojmë”, Kolegji Zgjedhor vendosi të shpallë të pavlefshme zgjedhjet pas një sërë shkeljesh.