Dërguti akuzon Vetëvendosjen se po favorizon Hashim Thaçin
Nënkryetarja e Kuvendit të Kosovës, njëherësh deputetja e Partisë Social Demokratike (PSD), Aida Dërguti ka folur rreth iniciativës së PSD-së për mbajtjen e një seance të jashtëzakonshme për platformën e dialogut, Kosovë-Serbi në Bruksel.

Dërguti tha në Telegrafi se LDK-ja dhe VV-ja, nuk i dhanë nënshkrimet e nevojshme për thirrjen e një seance të tillë.

Sipas saj, mos mbajtja e kësaj seance ia mundëson presidentit të vendit Hashim Thaçit, shkuarjen në Bruksel ashtu siç ka bërë gjithmonë.

“Mos mbajtja e kësaj seance ia mundëson Hashim Thaçit, shkuarjen e tij siç ka bërë gjatë këtyre viteve. Duke mos pasur konsensus brenda, Thaçi ka përfunduar qoftë në pozicionin e kryeministrit duke shkuar vet, duke bërë e nënshkruar marrëveshje për të cilat më vonë kemi pasur kokëçarje të mëdha. LDK dhe VV-ja nuk na i ka dhënë nënshkrimet. Përgjigja iu takon atyre pse nuk na i kanë dhënë nënshkrimet”, ka thënë Dërguti.

Ajo po ashtu tha se PSD-ja është e gatshme që këtë iniciativë t’ua jap LDK-së ose VV-së, vetëm që kjo të diskutohet në Kuvendin e Kosovës, para shkuarjes së presidentit të vendit për në Bruksel.

“Ne jemi të gatshëm nëse ata duan ta ndërmarrin këtë iniciativë. Ata nuk e nënshkruajnë vetëm pse është iniciativë e jona. Atëherë ne ua japim me shumë dëshirë cilit do prej tyre. Por le ta shohim këtë çështje të rëndësishme për Kosovën dhe ta bëjmë këtë debat para nisjes së Hashim Thaçit për në Bruksel”, u shpreh deputetja Dërguti.


Shtuar më 17/07/2018, ora 15:09

Shkruani komentin tuaj!
Të fundit nga kjo kategori