Bujar Bukoshi, kandidat për kryetar të LDK-së
Pëlqej
Ish-Kryeministri në mërgim i Kosovës, Bujar Bukoshi pritet të jetë njëri nga kandidatët për kryetar të LDK-së. Sipas Express, Bukoshi ka marrë përkrahje nga disa anëtarë të pakënaqur nga gjendja aktuale e partisë, e cila ka humbur në tri zgjedhjet e fundit si dhe ka humbur bastionin e saj, Prishtinën.

Edhe në zgjedhjet e fundit partiake në LDK, Bukoshi e pati shpallur kandidaturën por ishte tërhequr pasi kishte konsideruar se Fatmir Sejdiu kishte pamundësuar zhvillimin e garës demokratike.

I kontaktuar nga Express, Bukoshi nuk ka dashur të flas për këtë temë me arsyetimin se ndodhet jashtë vendit.

Ndryshe, zyrtarët e LDK-së kanë thënë se sikur të gjithë anëtarët e partisë edhe Bukoshi ka të drejtë të jetë njëri prej pretendentëve për të udhëhequr me Partinë e themeluar nga Ibrahim Rugova.

Zgjedhjet e brendshme në LDK pritet të mbahen më së largu në nëntor të këtij viti kur edhe i skadon mandati i Kryetarit aktual Isa Mustafa.

Fitoren e fundit LDK e pati arritur sa ishte gjallë Rugova në vitin 2004. Ndërsa, në vitin 2007 pati humbur primatin e partisë së parë. LDK ishte renditur pas PDK-së edhe në zgjedhjet e vitit 2010 kur në krye të partisë erdhi Isa Mustafa. Ky i fundit ka pësuar edhe dy humbje të tjera si kryetar i LDK-së: humbjen në Prishtinë dhe humbjen në zgjedhjet e fundit nacionale, ku përsëri LDK doli pas PDK-së. /albeu.com/
Shtuar më 09/08/2014, ora 16:57
Shkruani komentin tuaj!
Të fundit nga kjo kategori