Komisioni për Amadamentimin e Kushtetutës së Republikës së Kosovës miratoi planin e veprimit me të cilin parashihen ndryshimet e 22 amandamenteve kushtetuese.

Kryetari i këtij komisioni, Arsim Bajrami tha se me këto ndryshime kushtetuese hiqet mbikëqyrja dhe Kosova do ta fitojë pavarësinë dhe sovranitetin e plotë të saj. Deri më dhjetë shtator të këtij viti, Kuvendi i Republikës së Kosovës duhet t`i miratojë të gjitha ndryshimet kushtetuese dhe ligjet në mënyrë që java e dytë e shtatorit të jetë javë përfundimtare e mbikëqyrjes së pavarësisë.

Kryetari Arsim Bajrami e sheh interes vital përmbylljen e mbikëqyrjes së pavarësisë brenda këtij viti.

“Përgjegjësinë për ta qeverisur Kosovën do ta kenë institucionet tona. Ndërsa, prezenca civile ndërkombëtare ta marrë një rol këshillues dhe jo rol ekzekutiv. Jashtë kësaj skeme është çështja e EULEX-it për shkak se EULEX nuk ka bazë kushtetuese dhe për statusin dhe pozitën e tij do të adaptohet një marrëveshje e veçantë pas përmbylljes së pavarësisë së mbikëqyrur”, tha Bajrami.

Sipas tij me këto ndryshime kushtetuese dhe legjislative jepet një garanci më e lartë për respektimin e të drejtave të pakicave që jetojnë në Kosovë. /albeu.com/