Asociacioni i komunave serbe bëhet pas zgjedhjeve në Kosovë
Themelimin e Asociacionit të Komunave me shumicë serbe mund të shtyhet deri pas zgjedhjeve të përgjithshme në Kosovë, pasi të dyja palët po vazhdojnë me agjendën e bisedimeve pa përcaktuar kohën e Asociacionit.

Burime brenda qeverisë kanë konfirmuar se për Asociacionin po kërkohet një propozim nga Bashkimit Evropian.

Me ndryshimet që po bëjnë vazhdimisht të dy palët në planet e tyre rreth Asociacionit, qëndrimet skajshmërisht të ndryshme kanë shtyrë palët, sidomos atë kosovare që të kërkojnë ndihmën e Bashkimit Evropian, i cili është lehtësues në këtë proces.

Ndërsa zëvendëskryeministrja e Kosovës Edita Tahiri, nuk ka dashur të japë sqarime rreth çështjes së Asociacionit dhe çfarë saktësisht është kërkuar nga BE.

Por sipas përgjigjes që ka dhënë Zyra e Bashkimit Evropian në Kosovë, BE duket se nuk po preferon të shtyjë propozimet e veta rreth asociacionit, por që të shtyj palët në bisedime të gjejnë vetë një zgjidhje, të pranueshme dhe të qëndrueshme njëkohësisht.

"Ne nuk po i shtyjmë përpara propozimet tona, por po inkurajojmë të dyja palët që ta arrijnë një marrëveshje të pranueshme për të dyja palët e cila mund të jetë e qëndrueshme", thuhet në një përgjigje të Zyrës së Bashkimit Evropian në Kosovë për Radio Kosovën.

Ministri i Kthimit, Dalibor Jevtiq, ka konfirmuar se Asociacioni i Komunave serbe do të presë deri pas zgjedhjeve të përgjithshme në Kosovë, megjithëse ende nuk është caktuar data e zgjedhjeve në Kosovë. /albeu.com/
Shtuar më 28/02/2014, ora 12:09

Shkruani komentin tuaj!
Të fundit nga kjo kategori