Pas përfundimit të mandatit të ministres së Jashtme të Bashkimit Evropian në vitin 2014, në tre vitet e ardhshme baronesha Cetherine Ashton pritet të përfitojë 470 mijë euro të taksapaguesve evropianë.



Sipas gazetës britanike Telegraph, Ashton deri në vitin 2017 do të marrë 55 për qind të rrogës së saj themelore, 133 500 funte, përkatësisht 156 780 euro në vit. Shuma e parave dhe tatimi më i ulët se ai standard duhet t’iu garantojë pavarësi funksionarëve të lartë të BE-së dhe përkushtimin e tyre të plotë në punë deri në skadim të mandatit.




“Me rëndësi është që komisarët të mos fillojnë të kërkojnë punë të re gjatë muajve të fundit të mandatit të tyre në poste në BE, dhe të kenë kohë të mjaftueshme për të kërkuar punë të re përkatëse. Në këtë mënyrë ata edhe më tutje angazhohen 100 për qind në punën për të cilën janë të paguar dhe ekziston risk shumë më i vogël nga konflikti i interesit”, thuhet ne deklaraten për shtyp të Komisionit Evropian.