Drejtoresha e barnatores në Qendrën Klinike Universitare të Kosovës (QKUK), Enkelejda Gjonbalaj është arrestuar sot nën dyshimin për veprën penale të shpërdorimit të detyrë zyrtare.

Zëdhënësi i Policisë së Kosovës, Baki Kelani, ka konfirmuar se “një person është arrestuar”, duke mos dashur të japë detaje rreth emrit dhe arsyes së arrestimit.

“Mund të konfirmojmë se sot kemi arrestuar një person në QKUK nën dyshimin e shpërdorimit të detyrës zyrtare, dhe me urdhër të prokurorit publik, është dërguar në mbajtje”, është shprehur Kelani.

Sipas burimeve të Indeksonline, Gjonbalaj është arrestuar sepse është e dyshuar për rastin Palonosetron, i cili është përfshirë në listën esenciale të barnave, në kategorinë e citostatikëve edhe pse i njëjti në realitet ishte anti-emetik.

Instituti Demokratik i Kosovës (KDI) i cili bën monitorim të prokurimit publik në disa organizata buxhetore, duke e përfshirë edhe Ministrinë e Shëndetësisë, pati publikuar një raport për këtë aferë. Në bazë të këtij raporti problemi me këtë bar ishte fakti se ai zëvendësonte dy produktet më të lira 'Ondanosetron' dhe 'Granisetron'.

Sipas këtij instituti ky produkt është alternativ, i cili përdoret krahas dy barnave më të lira në raste kur ato nuk japin efekt. /albeu.com/