Gjilani ka shënuar fitoren e parë këtë sezon në Superligën e Kosovës.
Skuadra që edicionin e kaluar përfundoi në vendin e dytë, ka mposhtur 0-1 KF Llapin në stadiumin ‘Zahir Pajaziti’, të mërkurën pasdite.
Darko Nikac ka shënuar golin e fitores për Gjilanin, duke shënuar në minutën e 62’.
Para golit, Gjilani pati mundësi të mirë shënimi, por Fiton Hajdari ka dështuar nga pika e penalltisë.
Kjo ishte fitorja e parë e Gjilanit këtë sezon, që në xhiron e parë ishte mposhtur nga Feronikeli.
Ballkani ka shënuar edhe fitoren e dytë në Superligën e Kosovës, duke e mposhtur 3:2 Feronikelin në Therandë.
Skuadra e Ismet Munishit pati një pjesë të parë të jashtëzakonshme, duke e dominuar Feronikelin.
Mirlind Daku në minutat 6’ dhe 24’, shënoi për epërsinë 2:0 në pjesën e parë.
Në minutën e 63’, Daku kompletoi ‘het-trikun’, duke shënuar për 3:0.
Fundi i ndeshjes ishte i vështirë për Ballkanin, me Feronikelin që shënoi dy gola.
Ishte Marclei që shënoi në minutat 85’ dhe 88’.
Pavarësisht përpjekjeve të Feronikelit, rezultati mbeti i pandryshuar, me Ballkanin që merr edhe fitoren e dytë, në po kaq ndeshje.
