Ambasadori i Shqipërisë në Kosovë: Jam kundër gazit lotsjellës
Ambasadori i Shqipërisë në Kosovë, Qemal Minxhozi, ishte i ftuar në emisionin “Info-Box” të RTV Dukagjini ku eshte shprehur se, bashkëpunimi mes Kosovës dhe Shqipërisë duhet ta tejkalojë retorikën patriotike, por të kthehet në bashkëpunim më të madh ekonomik në mes dy vendeve.


Sipas tij, shkëmbimi tregtar mes dy vendeve, këtë vit, ka arritur rreth 200 milionë euro, ndersa para dy viteve ka qenë 150 milionë euro.

"Nëse ndonjëherë dalin problem gjatë shkëmbimeve tregtare në mes dy vendeve, ne duhet t’i ruajmë dozat e reagimit, sepse kemi të bëjmë më një ekonomi të hapur, ku ndryshojnë interesat nga një vend në tjetrin. Nuk ju ndodhin probleme vetëm Kosovës dhe Shqipërisë në aspektin ekonomik, por probleme në mes vete kanë edhe vendet evropiane", eshte shprehur ambasadori.

Minxhozi ka theksuar se shqiptarët këndej dhe andej kufirit duhet ta njohin më mirë njëri-tjetrin dhe se sipas tij, duhet te dime se, si Shqipëria ashtu edhe Kosova janë ekonomi të vogla, dhe duhet te kenë një bashkëpunim të ndërsjellë mes tyre.

Ai ka shtuar se nuk dëshiron që disa fenomene negative që kanë ndodhur në Parlamentin e Shqipërisë të transferohen edhe në Kosovë.

"Jam kundër përdorimit të gazit lotsjellës në sallën e Kuvendit dhe bllokimit të seancave. Nga ana tjetër edhe Qeveria duhet të jetë më aktive dhe të tregoj që është e gatshme të jetë pjesë e dialogut. Shpresoj që manifestimi i këtij 28 nëntori të jetë i qetë, sepse çdo eskalim do ta përdhoste këtë festë", shtoi Minxhozi. /albeu.com/
Shtuar më 26/11/2015, ora 15:09

Shkruani komentin tuaj!
Të fundit nga kjo kategori