Prokuroria Speciale ka ngritur aktakuzë ndaj ish-drejtorit për krime ekonomike të Policisë së Kosovës, Emin Beqiri dhe biznesmenit Rrahim Hashimi, për rastin e njohur si “Sekseri”.

Beqiri akuzohet për “Keqpërdorim të detyrës zyrtare”, “Pengimi i të provuarit apo procedurës zyrtare” dhe “Moslajmërimi i veprave penale”, ndërsa Rrahim Hashimi, sipas prokurorisë ka kryer veprat penale “Ushtrimi i ndikimit” dhe “Mashtrimi”.

“Prokuroria Speciale e Republikës së Kosovës, ka ngritur aktakuzë në lëndën penale të shenjëstruar si rasti “Sekseri”, kundër të akuzuarve E.B. në drejtim të veprave penale nga neni 422 paragrafi 1 i KPRK-së, nenit 394 paragrafi 2 i KPRK-së, dhe nenit 386 paragrafi 2 lidhur me paragrafin 1 të KPRK-së, dhe Rr.H. në drejtim të veprave penale nga neni 431 paragrafi 1 i KPRK-së, dhe 335 paragrafi 1 lidhur me nenin 81 të KPRK-së”, ka njoftuar Prokuroria e Shtetit.

Ish-shefi i krimeve ekonomike në Policinë e Kosovës, Emin Beqiri dhe biznesmeni Rrahim Hashimi dyshohen se u kishin marrë 100 mijë euro drejtuesve të organizatës QAD, për t’ua mbyllur një rast, shkruan Express.

Vetëm pak muaj para se të niste ky hetim, Policia kishte arrestuar 8 zyrtarë të organizatës QAD nën dyshimin se kanë krijuar skema piramidale, nëpërmjet të cilave kanë mashtruar fermerë të shumtë për grante bujqësore.