AAK preferon koalicion me NISMA-n dhe PSD-në
Partitë politike kanë nisur t’i bëjnë matematikat e tyre sa i përket garës së ardhshme zgjedhore. Disa prej tyre tashmë kanë shfaqur publikisht parapëlqimet për koalicionet e mundshme parazgjedhore, shkruan gazeta "Zëri".

Shefi i Grupit Parlamentar të AAK-së, Ahmet Isufi, ka thënë se aktualisht ky subjekt mendon që të hyjë i vetëm në procesin zgjedhor, mirëpo ai nuk e ka përjashtuar mundësinë që AAK-ja të garojë në zgjedhje duke bashkëpunuar edhe me ndonjë parti tjetër politike. Në këtë drejtim, si të mundshme për një koalicion eventual Isufi ka përmendur NISMA-n dhe PSD-në.

“Kemi deklaruar se kemi pasur një koalicion edhe parazgjedhor edhe gjatë qeverisjes me Nismën. Po ashtu me PSD-në kemi pasur bashkëpunime të mira sa i përket angazhimit të drejtpërdrejtë në Parlamentin e Kosovës për t’i votuar disa ligje të rëndësishme. Kjo bën që të këtë një afrim në mes këtyre subjekteve”, ka deklaruar ai.

I pyetur rreth një koalicioni të mundshëm me PDK-në, parti me të cilën AAK-ja ka bashkëqeverisur dy vjetët e fundit, Isufi ka thënë se një gjë e tillë ka shumë pak gjasa të ndodhë. “Ne kemi thënë se nuk kemi vija të kuqe për asnjë parti, por megjithatë ka dallime sa i përket distancës mes subjekteve politike dhe pak është e mundshme që të ndodhë një gjë e tillë”, ka vijuar deputeti i AAK-së.
Shtuar më 06/08/2019, ora 11:00

Shkruani komentin tuaj!
Të fundit nga kjo kategori