Nis votimi, demokratët zgjedhin sot kreun e ri

Partia Demokratike mban sot zgjedhjet për kryetarin e ri. Në garë janë katër kandidatë, kryetari në detyrë i PD Lulzim Basha, i cili do të sfidohet nga Agron Shehaj, Fatbardh Kadilli dhe Edit Harxhi.

Procesi i votimit ka nisur në orën 08:00 të mëngjesit dhe përfundon në orën 19:00 të pasdites. Në orën 19:30 nis numërimi i votave dhe deri në orën 08:00 të ditës së nesërme pritet dalja e rezultatit.

Zgjedhja do t’i takojë anëtarësisë së Partisë Demokratike në mbarë vendin, sipas parimit “një anëtar një votë”. Në total janë 75 mijë anëtarë dhe 76 qendra votimi, ku do të vendoset fati i drejtimit të partisë më të madhe opozitare në vend.

Në udhëzimin e fundit të kryetarit të Komisionit Zgjedhor në PD, Jemin Gjana, përcaktohet se një anëtar ka të drejtë të votojë vetëm një kandidatë në garë. Nëse zgjedh më shumë se një kandidat, vota e tij konsiderohet e pavlefshme.

Në fletën e votimit, i pari renditet Fatbardh Kadilli, i ndjekur nga Edit Harxhi, Agron Shehaj, dhe në fund kryetari në detyrë Lulzim Basha.

Këto zgjedhje vijnë pas humbjes në zgjedhjet e përgjithshme parlamentare të 25 prillit ku Edi Rama siguroi mandatin e tretë qeverisës.


Shtuar 13.06.2021 08:22

Tags: ,