Vrasje, gjoba dhe rrëmbime në Shkodër: Gjithçka nisi nga ky atentat (FOTO LAJM)

Pas arrestimit të të fortëve të grupit Bajri, prokuroria ështe duke hetuar intensivisht për një konflikt mes tyre dhe fisit Lici në Shkodër, i cili ka sjellë deri më tani një atentat të dështuar dhe disa viktima.

Hetimet për këtë konflikt nisën që në janar të këtij viti ku u tentua të vritej përmes një bombe të telekomanduar, Lul Kulla, i njohur si person i afërt me fisin Lici në Shkodër sipas burimeve.

Sipas organeve përgjegjëse, dyshohet kjo është edhe zanafilla e disa vrasjeve të tjera në Shkodër, siç është ekzekutimi i Boran Bërçamës dhe bashkëjetueses së tij si edhe e Fatbardh Licit.

Policia ka arrestuar dy persona të rendësishëm të fisit Bajri, siç janë Behari dhe Safeti. I pari i kap në Holandë, ndërsa Safet Bajri u arrestua në Tiranë.

Operacioni i koduar “Oaz”, u finalizua të premten me 11 persona të arrestuar e dy të tjerë të shpallur në kërkim, pas një hetimi intensiv që zgjati rreth 6 muaj. Mes të arrestuarve ishte edhe Safet Bajri, i konsideruar mes njerëzve kryesorë të grupit dhe i vëllai Ilir Rustemi, i arrestuar në ndërhyrjen e datës 6 shtator në Shkodër, gjithashtu me të njëjtin rol. Drejtori i Përgjithshëm i Policisë, Ardi Veliu, gjatë konferencës për shtyp tha se ishin shpallur në kërkim edhe dy persona të tjerë.

I pari Enver Bajri, drejtuesi kryesor grupit, ndërsa personi i dytë dyshohet si një nga personat që përdorej për të vënë gjoba. Burimet thanë se një tjetër personazh kyç në këtë grup është edhe Behar Bajri, i arrestuar në Roterdam, pasi ishte larguar prej më shumë se një jave më parë nga Shqipëria.

Informacioni për të u është përcjellë autoriteteve të huaja dhe në bashkëpunim me partnerët përfundoi në pranga. “Është provuar në javët e fundit se anëtarët e këtij grupi kriminal kanë kanosur dhe shtrënguar disa shtetas për dhënie shumash të konsiderueshme parash. Ky grup është i dyshuar dhe po hetohet intensivisht për disa nga ngjarjet e fundit të ndodhura në Shkodër”, theksoi Ardi Veliu gjatë konferencës për shtyp.

Sipas burimeve, gjobat e vendosura kohët e fundit, fillimisht u njoftoheshin të dëmtuarve nga Behar Bajri. “Behari jam”, u thoshte në telefon i dyshuari dhe më pas viheshin në lëvizje të tjerët, të cilët, siç rezulton nga përgjimet e shumta, i vendosnin afat të dëmtuarve në disa raste edhe me frazën: “…e mira është mos ta vonosh porosinë”.
Shtuar më 24/09/2018, ora 10:32
Shkruani komentin tuaj!
Të fundit nga kjo kategori