Robert Ndrenika mbush 75 vjeç, regjisori i njohur i thotë atë që nuk ia kishte thënë ndër vite (FOTO LAJM)

Pëlqej
Aktori i një sërë roleve të suksesshme e që ka shënjuar ndër breza, Robert Ndrenika, sot mbush 75 vjeç. Nga artistët dhe jo vetëm, asnjëherë nuk mjafton mirënjohja për atë që ka dhënë aktori i mirënjohur. Ne këtë ditë të shënuar për Ndrenikën, regjisori i njohur Pëllumb Kulla ka diçka për të thënë. Me anë të një postimi në faqen e tij të Facebook-ut, Kulla i shkruan aktorit të qindra roleve në kinema e teatër, ato që nuk ia ka thënë kurrë përballë.

"ROBERT NDRENIKA SHËNON SOT 75! Edhe ju më të rinjtë do të vinit te 75-at! Berti i dashur, ta uroj këtë ditë të shënuar. Ti, i shtrenjti Bert, meriton që sot, veç e veç, tok e tok, shtëpishtëpi, studjo më studjo, auditor më auditor, njerëzit të trokasin gotat me mendjen tek vitet e tua gjurmëlënës në skenat dhe ekranet e shqiptarëve.

Me ty, o shoku im i klasës dhe i shkollës, o miku im i vjetër, kemi kaluar bashkë një pjesë të mirë të këtyre viteve. Kemi biseduar dhe kemi qarë halle, jemi tallur e kemi ngacmuar njëri tjetrin, por kurrë unë nuk jam ndalur e nuk të kam thënë atë që do të të them pikërisht sot.

Atë që, ti i dashuri im, je një artist i madh, nga ata të ndriturit, nga ata që skenës dhe ekranit i vijnë rrallë, shumë rrallë.

Ti je nga ajo racë aktorësh që të zbukurojnë jetën dhe që i japin pavdekshmëri teatrit. Asaj loje magjepsëse ku njerëzit qeshin e qajnë për ca realitete të sajuara bukur. Ti, Bert, je nga ata aktorë të paktë që janë mjeshtra dhe në ndërtimin e figurave komike, dhe po aq mbresëlënës me karakteret dramatikë. Ti ke bërë aq shumë sa njerëzve kur u flitet për teatrin, mëndja u shkon vetëm tek artistë si ti", përfundon ai. /albeu.com/
Shtuar më 10/01/2017, ora 14:29
Shkruani komentin tuaj!
Të fundit nga kjo kategori