Arrestohen dy marinarët amerikanë, akuzohen se spiunonin për Kinën

Dy marinarë të marinës amerikane janë arrestuar dhe akuzuar për spiunazh për Kinën, sipas informacioneve nga Associated Press të transmetuara nga Reuters.

Një marinar 22-vjeçar që shërbente në një anije luftarake në San Diego u arrestua të mërkurën, duke u përballur me akuza në lidhje me spiunazh dhe komplot për të dërguar informacion tek zyrtarët kinezë, raportoi AP, duke cituar zyrtarë amerikanë që folën në kushte anonimiteti.

Një tjetër marinar u arrestua në bazën e marinës amerikane në Ventura County, në veri të Los Anxhelosit. Ai akuzohet për konspiracion dhe financim nga një zyrtar kinez, sipas informacioneve nga i njëjti burim.

Vitet e fundit, marrëdhëniet e Uashingtonit me Pekinin janë tensionuar për arsye që lidhen me sigurinë kombëtare dhe çështjet tregtare. SHBA e ka akuzuar Kinën për spiunazh dhe sulme kibernetike, por pala kineze i hedh poshtë akuzat. Kina ka bërë akuza të ngjashme në të kaluarën.

Probleme të tjera në marrëdhëniet kino-SHBA janë ndalimi i eksportit të teknologjisë së avancuar nga SHBA, politika industriale e Pekinit, abuzimet e të drejtave të njeriut në Kinë, origjina e koronavirusit që shkaktoi pandeminë Covid-19, tarifat tregtare dhe çështja e Tajvanit.


Shtuar 3.08.2023 20:04