Kryeministri Edi Rama është shprehur se edhe qyteti i Durrësit do të ketë një shëtitore të vetën, të ngjashme me Lungomaren e Vlorës.
Komentet Rama i bëri teksa ishte sot në një takim në Bashkinë e Durrësit, me kryebashkiaken dhe projektuesit e ndërhyrjes.
Rama shtoi se punimet pritet të nisin në përfundim të sezonit turistik të këtij viti dhe sipas tij projekti do të jetë me rëndësi ekonomike dhe turistike.
“Me mbarimin e këtij sezoni të fillojë puna, në vjeshtë. Nuk e di a do e bëjmë të gjithën përnjëherë apo me faza. Ta bëjmë e një ndërhyrje në det, një shqiponjë, ta gjejmë një pikë e ta përgatisim një shqiponjë të madhe e ndërtuar nga A-ZH komplet e aty bashkia mund të nxjerrë e përfitime të mëdha. Por kjo vjen në një fazë tjetër”, tha Rama.
“Bashkia Durrës – Me Anin dhe projektuesit e ndërhyrjes së madhe për një Lungomare në Plazhin e Durrësit, një projekt madhor me impakt të lartë ekonomik”, shkruan Rama në Facebook, krahas videos së postuar./albeu.com/
