“Ju falenderoj për mbështetjen dhe durimin”, Kurti reagon pas arritjes së marrëveshjes me Serbinë

Kryeministri i Kosovës, Albin Kurti ka reaguar për arritjen e marrëveshjes Kosovë-Serbi për lëvizjen e lirshme të qytetarëve.

Nëpërmjet një postimi në rrjetet sociale, Kurti thotë se qytetarët e Republikës së Kosovës, me dokumente identifikimi (ID) të lëshuara nga Kosova, do të mund të kalojnë pa pengesa, ngarkesa e vonesa kufirin me Serbinë në të gjitha vendkalimet kufitare.

Njësoj do të vlejë edhe për kahjen e kundërt me rastin e hyrjes në Kosovë me dokumente identifikimi (ID) të lëshuara nga autoritetet e Serbisë.

Ndërsa nuk nguron të falënderoje të gjithë qytetarët për mbështetjen dhe durimin, posaçërisht në këto katër javët e fundit.

 Reagimi i plote i Kurtit

Qytetarët e Republikës së Kosovës, me dokumente identifikimi (ID) të lëshuara nga shteti ynë, do të mund të kalojnë pa pengesa, ngarkesa e vonesa kufirin me Serbinë në të gjitha vendkalimet kufitare. Njësoj do të vlejë edhe për kahjen e kundërt me rastin e hyrjes në Kosovë me dokumente identifikimi (ID) të lëshuara nga autoritetet e Serbisë.
Ju falënderoj të gjithëve për mbështetjen dhe durimin, posaçërisht në këto katër javët e fundit.
Fryma e bisedimeve parimore e të barabarta në Bruksel është reciprociteti. Zgjidhjet normalizuese duhet ta kenë reciprocitetin përbrenda, teksa marrëdhëniet e mira fqinjësore e nënkuptojnë atë.
Falënderoj ndërmjetësit, zotërinjtë Borrell, Lajçak dhe Escobar, e sidomos ambasadorin amerikan Hovenier për angazhimin dhe kontributin.


Shtuar 27.08.2022 20:34