Drejtuesit e strukturave të degëve të Partisë Demokratike në Korçë kanë dhënë dorëheqjen nga postet e tyre, teksa ndihen të pavlerësuar nga lideri i opozitës, Lulzim Basha.
Mësohet se 51 anëtarë kanë dhënë dorëheqje menjëherë pas largimit të kryetarit të PD-së në këtë qytet, Andrea Mano dhe anëtarëve të Kryesisë.
Gjithashtu bëhet me dije se ata janë të pakënaqur më drejtimin e PD-së nga kryedemokrati, Basha.
“Me veprimet e tij mendojmë se z. Basha ka hedhur poshtë të gjithë mundin dhe sakrificat tona në opozitën më të vështirë në historinë e Partisë Demokratike”, shprehen ata.
Letra e plotë e 51 drejtuesve të strukturave të degëve:
Të nderuar demokratë dhe demokrate!
Ne si, Kryetarë, Sekretarë dhe Kordinatore të Lidhjes Demokratike të Gruas, solidarizohemi me dorëheqjen e anëtarëve të Kryesisë së Partisë Demokratike Korçë dhe kemi vendosur të japim dorëheqjen nga funksionet tona drejtuese.
Gjykojmë që, lideri aktual i saj, po tenton me arrogancën e tij, ta kthejë Partinë Demokratike në një parti klienteliste në funksion të interesave të tij personale. Me veprimet e tij mendojmë se z. Basha ka hedhur poshtë të gjithë mundin dhe sakrificat tona në opozitën më të vështirë në historinë e Partisë Demokratike.