Trazirat në Kazakistan, qeveria i kërkon ndihmë rusisë

Trupat e udhëhequra nga Rusia do të vendosen për të ndihmuar në “stabilizimin” e Kazakistanit mes demonstratave antiqeveritare.

Presidenti Kassym-Jomart Tokayev bëri thirrje për mbështetje nga Organizata e Traktatit të Sigurisë Kolektive (CSTO) ndërsa trazirat mbarëkombëtare u përshkallëzuan.

Protestat fillimisht nisën nga rritja e çmimeve të karburantit, por janë zgjeruar duke përfshirë ankesat politike.

Presidenti Tokayev akuzoi “bandat terroriste” të trajnuara nga të huajt se qëndronin pas trazirave.

Megjithatë, një eksperte për Azinë Qendrore në institutin e çështjeve të jashtme Chatham House në Londër, Kate Mallinson, tha se protestat ishin “simptomatike të zemërimit dhe pakënaqësisë shumë të thellë dhe të zjarrtë ndaj dështimit të qeverisë për të modernizuar vendin e tyre dhe për të prezantuar reforma që prekin njerëzit në të gjitha nivelet”.

Duke u zotuar për një përgjigje të ashpër ndaj protestave, presidenti shpalli gjendjen e jashtëzakonshme mbarëkombëtare që përfshin një shtetrrethim dhe një ndalim të tubimeve masive.

Në një fjalim televiziv në orët e para të së enjtes, ai tha se kishte kërkuar ndihmë nga CSTO, një aleancë ushtarake e përbërë nga Rusia dhe pesë shtete të tjera ish-sovjetike, për të ndihmuar në stabilizimin e vendit.

Më vonë të mërkurën, kryetari i CSTO-së, kryeministri armen, Nikol Pashinyan, konfirmoi se aleanca do të dërgojë forca paqeruajtëse “për një periudhë të kufizuar kohore”./albeu.com


Shtuar 6.01.2022 08:23