Kompania më e madhe e telekomunikacionit në Shqipëri, ALBtelecom, përmes një ceremonie në ambientet e “ALBtelecom Business Academy” ka diplomuar sot 23 studentë të brezit të tretë të profesionistëve të diplomuar nga kjo akademi.

Të pranishëm gjatë kësaj ceremonie diplomimi ishin Drejtori i Përgjithshëm i ALBtelecom z. Tahsin Yilmaz, drejtues të tjerë të kompanisë si dhe pedagogë e studentë.

Në përfundim të ceremonisë u shpall grupi më i mirë i ciklit të tretë të studimit dhe 2 studentët më të talentuar të kësaj akademie për këtë vit. Grupi më i mirë prezantoi projektin me temë: “Interneti i gjërave. Pajisjet shtëpiake inteligjente/ The Internet of Things. Smart Home Applications”.

Ky program studimesh është një investim i ALBtelecom, ideuar për të zhvilluar më tej aftësitë menaxhuese të punonjësve, duke i përgatitur ata si liderë të së ardhmes.

Procesi mësimor u ndërtua duke kombinuar teorinë me praktikën, diskutimet mes studentëve, prezantimet e punimeve mbi raste dhe analiza specifike studimi.

Gjatë ciklit të studimeve u shfaqën aftësitë e përfituara, hap pas hapi falë procesit mësimor si dhe spikatën talentet, idetë dhe projektet me vlerë, të cilat do të jenë objekt zbatimi i kompanisë në të ardhmen.

Akademia e Biznesit të ALBtelecom është licencuar nga Shërbimi Kombëtar i Punësimit, në kuadër të politikave të Ministrisë së Mirëqenies Sociale dhe Rinisë për arsimin profesional.