Gjatë së hënës është gjetur i vdekur në banesën e tij në Kaliforninë e Veriut, aktori amerikan Robin Williams. Lajmi për vdekjen e 63-vjeçarit është bërë publik nga policia e Kalifornisë, e cila ka deklaruar se dyshohet për vetëvrasje.

Më tej, të njëjtat burime të policisë kanë shtuar se kishin mbërritur në vendngjarje pasi kishin marrë një telefonatë, ku është gjetur i pajetë në banesën e tij. Kohët e fundit ai ka vuajtur nga depresioni, duke qëndruar për disa kohë në një qendër rehabilitimi.

“Hetuesit dyshojnë për një vetëvrasje, për shkak të asfiksisë, por pritet përfundimi i hetimeve për përcaktimin e plotë të vdekjes”, thuhej në deklaratën e policisë.

Bashkëshortja e Williams, Susan Schneider, u shpreh se ndjehej tepër e pikëlluar pas marrjes së lajmit. “Robin do të mbahet mend për momentet e panumërta të gëzimit dhe të qeshurat e tij që i dha për miliona njerëz”, tha Schneider.

Williams ka lindur në Çikago në 21 korrik 1951 dhe u bë i famshëm në filmat "Good Morning Vietnam" dhe "Dead Poet's Society". Aktori kishte tre fëmijë nga martesat e tij të mëparshme. Interpretimi i tij i parë ishte në show-n televiziv “Mork dhe Mindy”. Si një aktor komik, luajti në disa filma të ndryshëm si “Good Morning Vietnam”, “Dead Poets Society” dhe “Mrs Doubtfire”. Në vitin 1998 ai fitoi çmimin Oskar, si aktori më i mirë në rol mbështetës në filmin “Good Will Hunting”. /albeu.com/