Të pasurit vetëm pasurohen, të varfrit bëhen më të varfër! Shifrat tronditëse të Shqipërisë së 2018
Pëlqej
Sa më shumë “zhvillohet” Shqipëria aq më shumë rritet edhe hendeku mes të pasurve dhe të varfërve.
Agjencia e Sigurimit të Depozitave ka dërguar në Kuvend një raport për vitin 2017, çka tregon se të varfrit vetëm po varfërohen, ndërsa të pasurit rrisin pasurinë e tyre.

Sipas shifrave nga raporti i ASD 3.7% e depozituesve në bankat shqiptare kanë më shumë se gjysmën e parave.

Kjo shifër individësh që kanë para në banka, zotëron një pasuri në nivelin e 5.3 miliardë dollarëve, në kohën që kursimet në banka janë rritur me ritëm të ulët, vetëm 0.8% krahasuar me një vit më parë. Mesatarja shumëvjeçare e shtimit të depozitave në banka është 6.3%.

Në total janë 92 mijë individë që kanë më shumë se gjysmën e pasurisë, ndërsa pjesa tjetër afro 2 milionë e 300 mijë depozitues ndajnë tortën e 3.9 miliardë dollarëve, transmeton TvKlan. Gjithsej, vlera e depozitave në sistemin bankar në Shqipëri arriti në 9.2 miliardë dollarë.

Në 2016-n, 4% e individëve zotëronin 45% të totalit të depozitave, vlera e të cilave arrinte në 5 miliardë dollarë.

Ndërsa një studim i Bankës së Shqipërisë konstatoi se normën më të madhe të rritjes së kursimeve e kanë patur llogaritë e bizneseve, ndërsa 10 depozituesit më të mëdhenj zinin 6.1% të totalit të llogarive.

Me kalimin e viteve dhe përparimin e kapitalizmit në vend, kjo pabarazi do ndajë në mënyrë edhe më të dukshme klasat, ku klasa e mesme do bëhet edhe më e zbehtë, duke i lënë vendin dy ekstremeve: të pasur dhe të varfër.
Shtuar më 09/04/2018, ora 10:14
Shkruani komentin tuaj!
Të fundit nga kjo kategori