Një automjet Volkswagen Bora ngjyrë hiri dhe me targa 02 – 626 – FL, pronë e N. C. (emër i njohur për redaksinë), është djegur mbrëmë rreth mesnatës në Leposaviq, ndërsa përveç dëmeve materiale nuk ka të lënduar në njerëz.
Burime të KosovaPress-it bëjnë të ditur se ngjarja ndërlidhet me regjistrimin e automjetit në targa RKS që ka ndodhur gjatë ditës së djeshme dhe se automjeti është djegur qëllimshëm nga autorë deri tani të panjohur.
KosovaPress-i ka provuar të kontaktojë me zëdhënësin e policisë për rajonin e veriut në lidhje me ngjarjen, por deri në kohën kur po raportojmë ai nuk është përgjigjur.
Ndryshe, një ditë më parë në Leposaviq ishte djegur automjeti i një rreshteri policor.
Lidhur me rastin e djeshëm nga Prokuroria Themelore e Mitrovicës kanë për të ditur për Telegrafin se ka hapur rast në drejtim të veprës penale “Zjarrvënia”.
Zëdhënësi i kësaj prokurorie, Valon Preteni ka thënë se kryerësit e kësaj vepre janë të panjohur.
“Prokuroria në bashkëpunim me policinë është duke i hetuar këto raste. Për rastin e datës 26 është hapur rast në drejtim të veprës penale “Zjarrvënia”. Për rastin e datës 26 tetor kryerësit janë të panjohur”, ka thënë Preteni.
