UPDATE - Pas kërkesës së Bankës Ndërkombëtare të Azerbajxhanit (IBA), Gjykata e Tiranës ka vendosur sekuestro konservative ndaj gjithë kompanive të Rezart Taçit, njofton Portali Albeu.com.

Gjykata e Tiranës ka urdhëruar vendosjen e sekuestros konservative pranë Zyrës së Regjistrimit të Pasurive të Paluajtshme në Tiranë dhe vendosjen e sekuestros konservative mbi 85% të aksioneve të shoqërisë “ARMO”, të zotëruara nga shoqëria “AMRA Oil”.

Përveç kësaj, Gjykata po ashtu ka kërkuar vendosjen e sekuestros konservative mbi llogaritë bankare të dy shoqërive të sipërpërmendura, ndërsa ka kërkuar gjithashtu bllokim të pasurive të paluajtshme të “ARMO”, si dhe vendosjen e sekuestros konservative mbi gjendjen e stokut të saj deri në përfundim të gjykimit.

Vendimi është dhënë nga gjykatësi Ilir Çeliku ndërsa është marrë bazuar në kërkesën e Bankës Ndërkombëtare të Azerbajxhanit, e cila ka provuar me fakte para gjykatës se për të realizuar investime në Shqipëri në vitin 2008 ka depozituar në tre këste shumën prej 75 milionë eurosh në llogarinë e bankës Credins (kësti i parë prej 30 milionë euro me datë 18 nëntor 2008, kësti i dytë më datë 19 nëntor 2008 në shumën 40 milionë euro dhe kësti i fundit më datë 21 nëntor në shumën 5 milionë euro).

Sipas arsyetimit të Bankës nga Azerbajxhani, shuma e transferuar për bankën Credins në Shqipëri duhet të qëndronte në këtë bankë si depozitë, por Credins e ka përdodur atë si kredi për kompaninë “ARMO”. Kjo bankë, fillimisht ka kërkuar nga banka Credins dhe kompania "Amra Oil" kthimin e shumës prej 75 milion eurosh, por pas përgjigjes negative, ka kërkuar sekuestrimin e pasurisë së kompanive.


Teksti origjinal i vendimit të sekuestros për pasuritë e Rezart Taçit (i shkurtuar)



Nr. Akti 468
REPUBLIKA E SHQIPERISE
GJYKATA E RRETHIT GJYQESOR
TIRANE
VENDOSI

-Pranimin e kërkesës.
-Vendosjen e sekuestros konservative pranë Z.Rr.P.P. Tiranë
-Vendosjen e sekuestros konservative mbi 85% të aksioneve të shoqërisë “ARMO” sh.a. të zotëruara nga shoqëria AMRA Oil sh.a. (vlera e tyre nominale është 5.126.461.000 lekë)
-Vendosjen e sekuestros konservative mbi llogaritë bankare të shoqërisë “AMRA OIL” sh.a.
-Vendosjen e sekuestros konservative mbi llogaritë bankare të shoqërisë “Armo” Sh.a.
- Vendosjen e sekuestros konservative mbi pasuritë e paluajtshme të shoqërisë “ARMO” sh.a. dhe vendosjen e sekuestros konservative mbi gjendjen e stokut të kësaj shoqërie deri në përfundim të gjykimit.
-Sekuestroja të vendoset për një shumë jo më të madhe se 75,000,000 (shtatëdhjetë e pesë milion) euro.

Gjyqtar
Ilir ÇELIKU