Raporti sekret i CIA-s '76: Si u sigurua dosja shëndetësore e Enver Hoxhës
Në vazhdim të ciklit të dokumenteve të deklasifikuara të arkivit të Shërbimit amerikan, sjellim sot një dokument me një përmbajtje mjaft të rrallë. Dokumenti në fjalë, i zbuluar në Arkivin Kombëtar amerikan, përmend një fakt shumë interesant, i cili ka mundësi të hapë një debat ndërmjet mjekëve dhe dëshmitarëve të tjerë okularë, të cilët i qëndruan pranë diktatorit komunist në vitet e fundit të jetës.

Dokumenti, pjesë e dosjeve të shumta mbi Shqipërinë dhe Ballkanin, të cilat tashmë janë deklasifikuara për studiuesit e interesuar për këto çështje, është një raport sekret i ardhur nga Ambasada Amerikane e Romës për Departamentin e Shtetit të SHBA-ve. Në të i bëhet një analizë e hollësishme situatës në Shqipërinë e vitit 1976, sipas ambasadorit italian në Tiranë, dhe zbulohet për herë të parë një fakt i cili të surprizon me të dhënat që përmenden në të. Sipas tij, ambasadori italian në Tiranë, në dimrin e 1975-s, ka pasur mundësinë që të ketë në dorën e tij dosjen mjekësore të Enver Hoxhës.

Kjo dosje, e cila sipas dëshmive të mjekëve që i shërbenit Enver Hoxhës, por edhe liderëve të tjerë komunistë, ka qenë një prej dosjeve më sekrete të regjimit të Tiranës dhe me një pamundësi absolute për t’u zbuluar nga shërbimet e huaja. Dokumenti që botohet sot me sa duket rrëzon pretendimin e mjekëve shqiptarë mbi sekretin e kësaj dosjeje, duke hedhur dyshime të mëdha në vërtetësinë e dëshmive të tyre.

Me të drejtë lind pyetja nëse ambasadori italian në Tiranë u raportonte diplomatëve amerikanë në shkurtin e 1976-s se disa muaj më parë kishte pasur në dore dosjen sekrete mjekësore të diktatorit komunist shqiptar, atëherë kjo nënkupton qartë se kjo dosje i kishte kaluar tashmë zyrës së Shërbimit Sekret italian. Nuk përjashtohet mundësia që nëpërmjet italianëve, edhe shërbimet e tjera perëndimore të kenë pasur dijeni mbi këtë dosje, sigurisht nëse italianët kishin dashur ta ndanin këtë informacion me shërbimet partnere.

Megjithatë, siç del nga dokumenti sekret i Ambasadës Amerikane në Romë, dosja mjekësore e Enver Hoxhës ishte tashmë e njohur për të gjithë ata që kishin interesa në rënien e pushtetit komunist në Shqipëri.

Megjithatë, misteri i këtij dokumenti qëndron në një tjetër fakt, i cili megjithëse mungon në rreshtat e këtij raportimi, mund të hidhet si hipotezë e mundshme në prapaskenat gri të luftës së heshtur të shërbimeve sekrete. A mundet vallë që dosja mjekësore e Enver Hoxhës t’u jetë bërë e njohur shërbimeve sekrete perëndimore me idenë e gjetjes së mundësive për ta përshpejtuar sëmundjen e tij?

Një hipotezë sigurisht, por nëse do të rezultonte e vërtetë nga ballafaqimi i dokumenteve të tjera që mund të dalin nga thellësia e arkivave kombëtare amerikane, atëherë pyetja "Kush e vrau Enver Hoxhën?" nuk do të tingëllonte më vetëm si një titull i një shkrimi provokativ.

"1. Gjatë bisedës me një prej njerëzve tanë më 4 shkurt, ambasadori italian në Tiranë e përshkruan situatën në Shqipëri shumë të përkeqësuar dhe të ngjashme me një kamp të madh përqendrimi. Kjo situatë, sipas tij, vjen si pasojë e fushatës që po ndërmerret kundër burokratëve, e cila e ka helmuar shumë atmosferën, sa që për një shqiptar është e rrezikshme që t’i thotë mirëmëngjes një të huaji, nëse e shikon në rrugë rastësisht.

2. Si rezultat i kësaj fushate spastrimesh, ambasadori raporton se elita në pushtet është reduktuar shumë në numër dhe nga frika është tërhequr në taktika mbrojtëse për të ruajtur pozitat e saj. Në të njëjtën kohë, Sekretari i Parë Enver Hoxha është i sëmurë dhe ambasadori mendon se ai nuk do të jetë në skenë edhe për shumë kohë. Ambasadori raporton se ka parë gjatë vitit të kaluar dosjen mjekësore të përgatitur nga një grup doktorësh francezë, të cilët e kishin vizituar atë në Tiranë. Sipas kësaj dosjeje, Hoxha vuan nga një formë e avancuar e diabetit, si dhe nga efekte të mëdha negative në qarkullimin e gjakut. Ambasadori raporton se edhe Kryeministri Shehu nuk është në një shëndet të mirë, por gjithsesi ai tha se nuk është situatë serioze si ajo e Hoxhës. Një anëtar tjetër i udhëheqjes që është i sëmurë, sipas raportit të ambasadorit, është ideologu i Partisë, Kapo. Ambasadori raporton se Kapo ka udhëtuar për në Francë për trajtim mjekësor.

3. Ambasadori gjithashtu raporton se sot në Shqipëri ekziston një paranojë shumë e madhe. Bunkerë dhe tunele po ndërtohen përgjatë bregut të Adriatikut, si dhe në kufirin me Jugosllavinë apo anës rrugëve më të mëdha, si dhe në qendrat urbane. Ambasadave të huaja, si dhe asaj italiane, u është kërkuar që të ndërtojnë bunkerë mbrojtës brenda zonës së ambasadave (Ambasadori italian e ka refuzuar këtë kërkesë). Ndoshta për arsye të të gjitha këtyre ndërtimeve ushtarake, Shqipëria ka penguar eksportimin e çimentos në Poloni dhe tashmë po e importon atë nga jashtë. Një tjetër shenjë e mundshme e frikës së shqiptarëve nga një agresion nga jashtë është fakti që zëvendësministri i Jashtëm, Nushi, pyeti ambasadorin në dhjetorin e kaluar nëse NATO do të ndërhynte po qe se Jugosllavia do të sulmohej nga forcat e Traktatit të Varshavës. Një javë më vonë, ambasadori jugosllav pyeti ambasadorin (italian shën. i ynë) nëse NATO do të ndërhynte në rast të një sulmi kundër Shqipërisë.

4. Duke iu referuar çështjes së "të rinjve" në aparatin burokratik, ambasadori tha se të gjithë ata duken se vinë nga radhët e Partisë. Ai mendon se ata të gjithë janë zgjedhur pasi janë besnikë të klikës Hoxha-Shehu. Ai përmendi në veçanti Pali Miskën dhe Llambi Gegpriftin, si me më mundësi të futen në grupin e ri dhe të gjithë janë me moshë diku tek fundi i 40-ve apo fillimi i 50-ve". (Auron Tare) /albeu.com/
Shtuar më 03/09/2013, ora 16:20
Shkruani komentin tuaj!
Të fundit nga kjo kategori