Një propozim martese është një nga ngjarjet më intime për një njeri gjatë jetës së tij. E megjithatë, së fundi dhe gjithnjë e më tepër, rastet e propozimeve në publik po rriten. Përse vallë?

Propozimi tradicional i martesës është një moment intim dhe shumë personal dhe, mbi të gjitha, zakonisht nuk shoqërohet me ndonjë ceremoni të posaçme, sikundër ndodh me fejesën, apo martesën. Propozimet mund të bëhen në ndonjë restorant, në ndonjë vend të qetë në natyrë, ose vende që kanë një domethënie për çiftin që kërkon të celebrojë dashurinë. Por tani shohim një tendencë në rritje për propozime “publike”. Këtë mund ta provoni nëse do të klikoni në “YouTube”. Do të shihni raste të panumërta propozimesh para njerëzve dhe në vende publike. Kështu, ka propozime të bëra në stadiume përmes parullave dhe sloganeve të mëdha që zënë sipërfaqe të mëdha hapësire. Ose ka nga ata që kanë më shumë para dhe preferojnë që propozimin ta bëjnë përmes qiellit, duke paguar një helikopter të vogël apo balonë që të mbajë lart parullën ose një zemër. Disa propozime bëhen në metro, në aeroporte dhe të gjitha këto bëhen më pas edhe më publike, pasi hidhen në “YouTube” dhe shihen nga miliona vetë. E një pjesë e këtyre mund të mendojë që të bëjë të njëjtën gjë me të dashurën, apo të dashurin. Pra, në njëfarë mënyre, kemi të bëjmë me një “infeksion”. Në këtë frymë, veçanërisht në Londër, por edhe në metropole të tjera, kanë nisur që të lulëzojnë agjenci të posaçme që merren me organizimin e propozimeve të tilla publike. Bëhet fjalë për organizime që nisin me ide e përfundojnë me realizimin dhe festimin e saj. Për këtë, në dispozicion të njerëzve vihet një “meny” e vërtetë variantesh, sigurisht me çmimin përkatës përkrah. Dhe numri i atyre që duan ta bëjnë sa më të veçantë e publik edhe momentin e propozimit sa vjen e po rritet. Ndoshta një pjesë mendon “me djallëzi” se një propozim i bërë në publik nuk mund të refuzohet. Ndoshta, por për hir të së vërtetës duhet thënë se ka edhe propozime që kanë qenë të veçanta për mënyrën e bërjes, por edhe për mënyrën e refuzimit. Në raste të tilla kompania e cila organizon ceremoninë, sigurisht që nuk mban përgjegjësi.

Një rast i veçantë është edhe ai i prenotimit të një kori të madh njerëzish, të cilët me parullën në dorë dalin në një rrugë apo vend të posaçëm dhe i përçojnë mesazhin personit të “dashur”. Kjo tendencë tashmë ka marrë përmasa shumë të mëdha. Në Britaninë e Madhe, raste të tilla po shtohen dita-ditës dhe madje po bëhen evente publike. Sipas disa psikologëve, kjo mund të shpjegohet me rritjen e presionit këto kohë për martesat. Ata që zgjedhin një mënyrë të tillë për të bërë një propozim martese mund të mendojnë se nuk do të refuzohen pikërisht edhe për shkak të kësaj mënyre kaq publike, e cila është e vështirë që t’i thuash jo. Ndonjëherë mund të shndërrohen edhe në një kurth të vërtetë dhe të pakëndshëm për disa partnerë, që duan vetëm një lloj lidhjeje të caktuar me partnerin tjetër dhe jo impenjim të natyrës martesore. “Ka mundësi që disa meshkuj të mendojnë se përmes një propozimi publik e dashura e tyre do të mendojë se ai i do me të vërtetë. Por jo të gjitha rastet janë të tilla”, thotë një psikolog që ka bërë edhe një studim dhe punim të posaçëm për këtë fenomen në rritje. Personi të cilit i drejtohet propozimi në një vend publik dhe para shumë njerëzve, ndihet i shtrënguar që të japë vetëm një lloj përgjigje, sepse në këtë rast edhe kalimtarët e rastit janë me propozuesin. Dhe ky është një shtrëngim i vërtetë dhe ndonjëherë mund të shkojë edhe në afërsi të “dhunës psikologjike”. Ekziston rreziku që djali të marrë përgjigjen e duhur, por për arsyen e gabuar dhe kjo për faj të zgjedhjes së tij të nxituar dhe jo të duhur. Dëshira për një propozim të veçantë që të mbahet mend gjatë mund të mos shoqërohet gjithmonë vetëm me publicitetin. Një zgjedhje mund të jetë një vend shumë special dhe i veçantë, por që jo domosdoshmërisht është në sy të publikut, si për shembull maja e një mali, një kulle, bregu i një deti e të tjera si këto. Por nëse kërkohet me të vërtetë një propozim publik, ai duhet që të përshtatet me personin dhe situatën, përndryshe do të ketë efektin e kundërt, madje të keq. Dikush mund ta marrë për ndërhyrje të tepruar të partnerit në jetën e tij private dhe ka pasur edhe raste të prishjes përfundimtare të marrëdhënieve të një çifti, pikërisht për shkak të këtij publiciteti të madh.
(Gazeta Shqip)