“Big Brother Supermarket”
Si i “spiunojnë” klientët dhe dinë gjithçka për ta.

Nga të dhënat e ndryshme që grumbullojnë arrijnë të gjejnë gjithçka për të ardhmen tonë. Meqë shumë shërbime kryhen online, e kanë shumë më të lehtë për të na vjedhur gjërat tona personale

Vajza e “Complain Department” u bë flakë e kuqe kur zotëria i tregoi kuponët me uljet për ushqimet e fëmijëve dhe panolinat. “Vajza ime i gjeti në kutinë postare. Ajo shkon ende në lice. Kërkoni t’i mbushni mendjen që të mbetet shtatzënë?”. Vajza e zyrës së ankesave kontrolloi edhe një herë plot siklet. Ishte adresa e vajzës së tij, ndërsa dërguesi ishte pikërisht supermarketi “Target”, gjiganti me një xhiro marramendëse vjetore, me 400 mijë punëtorë e 1200 dyqane vetëm në SHBA. Faljet nuk mjaftuan. Kaluan disa ditë. Vajza mori telefonin për të kërkuar falje edhe njëherë: ne përpiqemi gjithmonë t’u bëjmë oferta të mira klientëve tanë më të mirë, por nuk di ç’të them. “Shiko, bisedova me vajzën time. Me sa duket, kanë ndodhur gjëra për të cilat unë nuk isha në dijeni. Do të lindë në gusht. Jam unë ai që duhet të kërkoj falje”, - tha babai. Në fakt, historia e supermarketit, që e mori vesh para babait se vajza ishte shtatzënë, duket një barsoletë. Kjo histori e vërtetë, e ndodhur në Mineapolis, është bërë “parabola” e fundit e kapitullit të dhunimit të hapur të privatësisë. Supermarketet janë kthyer në një lloj “Big Brother” të kohëve moderne. Dhe nuk kënaqen vetëm duke grumbulluar të dhënat tona personale për të nisur ofertat e radhës. Këtu përfshihen edhe librat që mund të na pëlqejnë më shumë nga ato që kemi blerë në “Amazon”, telefoni që kushton më pak, sepse gjëja e parë që shohim online është çmimi, apo dhuratat më pak të lira për ditëlindje. Tani ky lloj “vëllai i madh” na përgjon deri në atë pikë, sa na parashikon edhe të ardhmen: ardhjen në jetë të një fëmije, zhvendosjen në një tjetër shtëpi, madje dhe divorcin, që na detyron të ndryshojmë zakonet, dhe bashkë me to edhe supermarketin. Në fakt, në çdo vend të botës tani supermarketet po krijojnë atë që quhet “Guest marketing analytics”, e ku punësohen psikologë të sjelljes dhe ekspertë të statistikës. Mbledhja e të dhënave pak apo shumë të autorizuara nuk është diçka e re: por e re është teknika që i çon supermarketet e mëdha si “Target”, t’i dorëzojë gjithsecilit një “costumer Id”. Ky numër identifikimi i klientëve thotë gjithçka për ne: jo vetëm kush jemi dhe ku jetojmë, por edhe se çfarë blejmë dhe përse e blejmë. Në të vërtetë, përhapja e mjeteve të pagesës elektronike dhe të konsumit online ka shtuar kontrollin mbi lëvizjet tona nëpër departamentet e ndryshme të supermarketit. Por mbi të gjitha, janë zhvillimet në fushën e psikologjisë që e kanë bërë më “guximtar” “vëllain e madh”. Shtimi i ofertave dhe bumi i blerjeve online janë një “ushqim” edhe për ne klientët. Kurrë më parë se sot nuk mund të zgjerojmë zgjedhjen tonë duke krahasuar çmimet dhe shërbimet: nga dyqani poshtë shtëpisë, tek supermarketi në pjesën tjetër të botës. Pikërisht këtu lind edhe dëshira e madhe e “Supermarketit Big Brother” për të njohur mirë zakonet tona. Blerjet janë një prej zakoneve tona të përditshme. Nëse jemi mësuar të kalojmë nga supermarketi për të blerë shampo dhe detergjentë, tek kasapi ynë i besuar për të blerë mish dhe nëse të gjitha shërbimet që ne kryejmë bëhen online, gjithçka merret vesh në kohë reale. Në fakt, zakonet janë një mekanizëm psikologjik thelbësor për të mbijetuar. Janë pikërisht ato që na shtyjnë të bëjmë gjëra të komplikuara pa u menduar. Po ashtu, janë zakonet ato që rregullojnë shpenzimet tona. Një studim i Universitetit të Kalifornisë ka treguar se kur kalojmë karrocën plot ushqime në supermarket, lëmë aty plot gjumë të karakterit tonë apo të ngjarjeve që na kanë ndodhur në jetë: një fëmijë, një divorc, një zhvendosje. Ja, pikërisht në këtë mënyrë supermarketet “spiunë” dinë edhe për të ardhmen tonë. Edhe për zakonet tona dihet gjithmonë e më shumë. Kujdes, supermarketi “x” po ju vëzhgon! (Gazeta Shqip)
Shtuar më 21/02/2012, ora 17:08

Shkruani komentin tuaj!
Të fundit nga kjo kategori