Trump: Edhe Italia do të ishte më mirë jashtë Bashkimit Europian
Edhe Italia do të ishte më mirë jashtë Bashkimit Europian; mediat ne fqinjin tonë përtej Adriatikut thonë se këtë koment, presidenti amerikan Donald Trump e bëri gjatë bisedës me njërin prej liderëve të fushatës së Brexiti-it, Nigel Farage në kuadrin e një programi radiofonik.

Duke komentuar shtyrjen e fundit të divorcit të Londrës nga Brukseli, shefi i Shtëpisë së Bardhë tha se Britania ende po mbahet peng nga BE-ja.

Edhe vende të tjera, ka shtuar ai, do të ishin më mirë pa bllokun europian. Një ndërhyrje kjo që sipas shtypit Italian, vjen në momentet kur politika italiane është sakaq mjaft e ngarkuar, e që me vështirësi arriti ta fashiste vrullin anti-europian përmes qeverisë së re Conte, e cila e ndihmoi Romën të ripozicionohej sërish qartë në kampin e BE-së.


Në Britani ndërkohë, temë ditë janë zgjedhjet e 12 dhjetorit, të thirrura nga kryeministri Boris Johnson me mbështetjen e liderit opozitar Jeremy Corbyn, pas vendimit të Bashkimit Europian për ta shtyrë datën e finalizimit të Brexitit në 31 janar.

Johnson deklaroi se publiku duhet “të zgjedhë” për të ardhmen e Brexitit. Vendimi për largimin e Mbretërisë së Bashkuar nga blloku evropian erdhi pasi 52 për qind e votuesve votuan për shkëputje në referendumin e 2016-tës, krahasuar me 48 për qind që e kundërshtuan këtë lëvizje.
Shtuar më 01/11/2019, ora 13:15

Shkruani komentin tuaj!
Të fundit nga kjo kategori