Si po përballet Bashkimi Europian me refugjatët dhe azilkërkuesit ekonomikë
Nga Lavdrim Lita

Bashkimi Europian po përballet me një sfidë të migrimit masiv që nuk shihej që nga Lufta e Dytë Botërore. Ajo është kthyer si toka e premtuar për hebrenjtë. Sipas të dhënave të agjencisë europiane të kufirit jashtëm, Frontex, 340 mijë njerëz me kombësi të ndryshme kanë kaluar tashmë kufijtë europianë që nga janari, duke tejkaluar kështu shifrën për të gjithë vitin 2014 (280 mijë).

Në këtë situatë të jashtëzakonshme, Bashkimi Europian po merr masa të jashtëzakonshme. Ministrat e Brendshëm të 28 vendeve të BE-së do të mblidhen me 14 shtator në Bruksel në një seancë jashtë radhe për të trajtuar rregullat mbi azil kërkimin dhe mbrojtjen e refugjatëve, si dhe trajtimin ndryshe të imigrantëve ekonomikë.

Një nga pikat më kritike është procedimi përmes sistemit të Dublinit për aplikimin për azil në vendin e parë të hyrjes në një vend të BE-së sepse Greqia, Italia dhe Hungaria nuk mund të mbajnë peshën të vetme dhe se shumë refugjatë e emigrantë ekonomikë nuk dëshirojnë të ndalojnë as në Greqi, Itali apo Hungari.

Pika e dytë do të jetë dakordësimi për marrjen me kuota të azilkërkuesve sipas kriterit të debatuar të popullsisë, papunësisë dhe prodhimi të Brendshëm Bruto. Këtu disa vende të lindjes së Europës si Polonia, Hungaria, Sllovakia dhe Çekia nuk dëshirojnë të hyjnë në sistemin e ndarjes me kuota.

Madje, ministri brendshëm sllovak deklaroi për gazetën amerikane “Uall Street Journal” se do pranonin vetëm refugjatë sirianë katolikë sepse në Sllovaki nuk ka xhami për integrimin e myslimanëve. Ndërsa Britania e Madhe ka planifikuar të marrë 18 mijë refugjatë nga kampet e Turqisë apo Jordanisë dhe jo të hyjë brenda sistemit europian.
Megjithatë Komisioni Europian, që mbron interesin e përgjithshëm të qytetarëve të BE-së, do të kërkojë një rialokim të azilkërkueseve në vendet e tjera të BE për të lehtësuar sa do pak Greqinë, Italinë dhe Hungarinë nga pesha e papërballueshme.

Presidenti i Komisionit Europian Juncker do të adresojë këtë problem në fjalimin e së mërkurës për gjendjen e BE-së përpara parlamentit Europian.

Për BE-në do të jetë jetësore një përgjigje pozitive e qeverisë britanike dhe atyre të Vishegradit. Te gjitha vendet tashmë kanë rënë dakord që së paku të harmonizojnë politikën e tyre për “vendet e sigurta të origjinës” duke iu bashkangjitur Maqedonisë dhe Serbisë, edhe Shqipërinë, Kosovën dhe Malin e Zi.

Të gjithë azilkërkuesit ekonomikë në vendet e BE, sidomos në Gjermani që janë 190 mijë në total, do shkojnë drejt një procedure riatdhesimi. Gjermania, sipas Financial Times, po shikon mundësinë e krijimi të një rruge legale të emigrantëve nga Ballkani perëndimor duke parashikuar të pranojë rreth 20 mijë punëkërkues çdo vit.

Qeverinë e Ballkanit Perëndimor kanë marrë angazhime në samitin e Vjenës për të trajtuar problematikën e imigrimit të pakontrolluar të qytetarëve të tyre. Ndërsa BE-ja ka siguruar se do të financojë projekte ndërlidhëse energjetike, infrastrukturore dhe ekonomike për të nxitur një dinamizëm të ri në rajon.

Kjo qasje e BE-së për të trajtuar problemin në vendin e origjinës është një nga pikat e forta mbi të cilën po bazohet strategjia e saj për t’u përballur me krizën e refugjatëve, imigrantëve dhe azilkërkuesve ekonomikë dhe socialë. Ndërhyrja multi-vektoriale është e vetmja mënyrë për të trajtuar një krizë që ka shkaqe dhe problematika të ndryshme.

*Autori është gazetar nga Tirana dhe njohës i mirë i rrethanave politike e shoqërore në Shqipëri, Kosovë e Maqedoni. MA në Kolegjin Europës. /Albeu.com/
Shtuar më 08/09/2015, ora 21:16
Shkruani komentin tuaj!
Të fundit nga kjo kategori