Në Rusi merren masa ekstreme sigurie për Lojrat Dimërore
AutoritetetRusi kanë ndërmarrë një nga operacionet më të mëdha të sigurisë në historinë e lojrave olimpike, një muaj para nisjes së Lojrave Dimërore në resortin e Socit.

Mediat ndërkombëtare bëjnë të ditur se autoritetet po vendosin mbi 30 mijë policë dhe trupa të Ministrisë së Brendshme, dhe që tani po kufizohet aksesi në zonë.

Shqetësimi kryesor i rusëve vjen nga kërcënimet për sulme të militantëve islamikë nga rajoni i Kaukazit Verior.

Personi më i kërkuar në Rusi, lideri i rebelëve çeçenë Doku Umarov, u ka bërë thirrje luftëtarëve të tij që të shënjestrojnë Lojrat Dimërore. Vetëm pak ditë më parë tre sulme të njëpasnjëshme, dy me bomba si dhe një grua kamikaze, çuan në vdekjen e dhjetra personave

Korrespondenti i BBC në Moskë deklaron se atentatet e ndodhura në ditët e fundit në Volgograd kanë shtuar shqetësimet e administratës ruse.

“Duke filluar nga 7 janari, të gjitha divizionet përgjegjëse për sigurinë e pjesëmarrësve në eveniment do të jenë në gatishmëri për luftë”, ka deklaruar ministri i Emergjencave, Vladimir Puchkov.

Ai ka nënvizuar se çdo godinë do të merret në mbrojtje dhe do të aktivizohet një sistem monitorues nga hapësira. Autoritetet ruse po ngrenë dy zona sigurie për të mbrojtur lojrat olimpike dimërore.

Një “zonë e kontrolluar” pranë komplekseve olimpike do të kufizojë aksesin e personave të pajisur me biletë dhe do të verifikojë identitetet, ndërsa një tjetër “zonë e ndaluar” do të ngrihet në rrethinat e Socit. /albeu.com/
Shtuar më 07/01/2014, ora 12:21
Shkruani komentin tuaj!
Të fundit nga kjo kategori