Kryeprokurori amerikan Sessions akuzohet të ketë takuar 2 herë ambasadorin rus
Prokurori i Përgjithshëm Jeff Sessions ka takuar ambasadorin e Rusisë dy herë gjatë fushatës presidenciale të Donald Trump vitin e kaluar, diçka të cilën ai e mohoi gjatë seancës për konfirmimin e tij si prokuror i përgjithshëm.

Lajmi është konfirmuar nga qeveria amerikane pas raportimit fillestar nga e përditshmja amerikane “Uashington Post”, e cila citonte zyrtarë të departamentit të drejtësisë.

Në një nga takimet e zhvilluara në muajin shtator sesion dhe ambasadori rus Sergei Kislyak kanë zhvilluar një bisedë private në zyrën e senatorit në kulmin e debatit të inteligjencës amerikane që akuzonte Rusinë për një fushatë kibernetike me qëllim ndërhyrjen në garën presidenciale amerikane.

Zbulimet e reja mund të nxisin kongresin që të hetojë rolin e pretenduar të Rusisë në zgjedhjet e 2016. Për të njëjtën arsye, pra për kontaktet me ambasadorin rus dhe për fshehjen e tyre Michael Flynn, këshilltari i parë i Sigurisë Kombëtare u shkarkua nga detyra pak kohë më parë.

Si prokuror i Përgjithshëm, Sessions mbikëqyr Departamentin e Drejtësisë, përfshirë edhe Byronë Federale të Hetimeve, të cilat janë udhëheqëse të hetimeve të ndërhyrjes ruse dhe çdo lidhje me bashkëpunëtorët e Trump.

Sipas Uashington Post, në kohën kur Sessions ka zhvilluar takime me Kislyak në korrik dhe shtator ishte anëtar i lartë i Komitetit të Senatit për Shërbimet e Armatosura si dhe një nga këshilltarët më të lartë të politikës së jashtme të administratës Trump.

Session ka luajtur një rol të rëndësishëm në mbështetje të Trump që prej shkurtit të 2016 kur edhe iu bashkua zyrtarisht fushatës elektorale.

Liderja e demokratëve në senat Nancy Pelosi i bëri thirrje Prokurorit të Përgjithshëm Jeff Sessions të japë dorëheqjen të mërkurën pas raportit të “Uashington Post”. Pelosi gjithashtu bëri thirrje për një hetim të pavarur, bipartizan për lidhjet e mundshme të Trump me rusët, shkruan oranews.

Një komision i kongresit amerikan ka vendosur hetimin nëpërmjet një komisioni dy-partiak te ndikimit rus në zgjedhjet e vitit të kaluar. Sakaq, House Intelligence do të shqyrtojë kontaktet midis anëtarëve të konfirmuar të stafit të fushatës elektorale të presidentit Trump dhe Moskës. FBI dhe Inteligjenca e Senatit, gjithashtu janë duke hetuar për të zbuluar ndërhyrje të mundshme të Moskës, gjatë zgjedhjeve të vitit të kaluar.
Shtuar më 02/03/2017, ora 18:30

Shkruani komentin tuaj!
Të fundit nga kjo kategori