Kremlini sulmon aktorin Morgan Freeman
Zëdhënësi i Kremlinit, Dmitry Peskov, kritikoi aktorin amerikan, Morgan Freeman, për një video që ai e ka bërë për një organizatë jofitimprurëse në SHBA.

Në këtë video, që është lëshuar më 19 shtator nga Komiteti për Hetimin e Rusisë, Freeman thotë se SHBA është “në luftë” me Rusinë dhe bën thirrje për të hetuar ndërhyrjen e dyshuar të Moskës në zgjedhjet presidenciale në SHBA, më 2016.

Duke folur në Moskë, Peskov tha se Kremlini nuk e merr seriozisht videon e Freemanit.

Ai tha se Kremlini nuk e konsideron atë si kërcënuese, por më pas bëri sulme personale mbi aktorin, duke e quajtur “viktimë të tensionit emocional”.

Peskov tha se Freeman “nuk i ka informacionet e vërteta për gjendjen reale të gjërave”.

Presidenti i Rusisë, Vladimir Putin, ka përkrahur në mënyrë selektive njerëzit e famshëm, duke u dhënë shtetësi ruse artistëve dhe sportistëve perëndimorë, të cilët kanë mbështetur publikisht agjendën e politikës së jashtme të Kremlinit. /albeu.com/

Shtuar më 21/09/2017, ora 16:38
Shkruani komentin tuaj!
Të fundit nga kjo kategori