Izraeli në zgjedhje, Neteyahu rrezikon fitoren e pestë
Izraelitët sot po votojnë në zgjedhjet e përgjithshme të vendit të tyre. Kryeministri i deritashëm, Benjamin Netanyahu, po e kërkon mandatin e pestë me radhë, por gara pritet të jetë e fortë dhe rezultati tejet i ngushtë.

Akuzat për korrupsion dhe sfidimi i fuqishëm nga ish-komandanti i ushtrisë, Benny Gantz, e kanë vënë seriozisht në rrezik fitoren e Netanyahut në këto zgjedhje.

Gantz është kryetar i aleancës “Kaltër e Bardhë” dhe po e sfidon Netanyahun në çështjet kryesore të sigurisë, duke premtuar politikë më të pastër.

Në anën tjetër, Partia e Punës, e cila e kishte nënshkruar një marrëveshje të paqes me palestinezët në vitet e nëntëdhjeta, e ka humbur përkrahjen e popullit viteve të fundit.

Asnjë parti në Izrael nuk ka arritur ndonjëherë ta fitojë shumicën e votave në kuvendin me 120 ulëse dhe vendi gjithmonë është udhëhequr nga qeveria e formuar përmes koalicioneve.

Negociatat për themelimin e qeverisë së re pritet të fillojnë sonte rreth orës 22 sipas kohës lokale, menjëherë pasi të publikohen rezultatet e para.
Shtuar më 09/04/2019, ora 16:28
Shkruani komentin tuaj!
Të fundit nga kjo kategori