Ambasadorja amerikane Yuri Kim i është drejtuar kandidatëve të ish-kryeministrit Sali Berisha me disa pyetje.
Kim është shprehur se sponsori i tyre, Sali Berisha, është i shpallur “non grata” për korrupsion nga Shtetet e Bashkuara dhe ajo nuk kupton se çfarë po u premton ai votuesve.
Komentet Kim i ka bërë në një postim në Tëitter, ku pyet sërish se kush do i drejtojë nëse fitojnë zgjedhjet.
“Pyetje për kandidatët: Nëse sponsori juaj kryesor është dikush i caktuar nga SHBA për korrupsion të konsiderueshëm, çfarë saktësisht po u premtoni votuesve? Kush do t’ju drejtojë nëse fitoni dhe çfarë do t’i detyroheni atyre? Çfarë duhet të presin shqiptarët? Çfarë duhet të presin SHBA?”, shkruan Kim.
Ish-kryeministri Sali Berisha u shpall në maj të vitit kaluar “non grata” nga Shtetet e Bashkuara për korrupsion dhe minim të demokracisë. Berisha, i përjashtuar nga Partia Demokratike me vendim të Lulzim Bashës garon në zgjedhjet e 6 marsit me kandidatët e tij, nën siglën “Shtëpia e Lirisë.
Sakaq, gjatë ditëve të fundit në fushatë është përfshirë edhe Vangjush Dako, i cili mbështet kandidaten e PS në Durrës. Dako është gjithashtu i shpallur “non grata” nga SHBA./albeu.com/
Questions for candidates: If your main sponsor is someone designated by the US for significant corruption, what exactly are you promising voters? Who will own you if you win and what will you owe them? What should Albanians expect? What should the US expect?
— Ambassador Yuri Kim (@USAmbAlbania) February 21, 2022
