Egjipti pas Mubarakut
The Economist
Trafiku i Kajros po i kthehet normalitetit-ndërkryerjes së pashpresë-teksa protestuesit kanë filluar të largohen nga sheshi Tahrir, skena e festimeve madhështore qysh nga lajmërimi se Hosni Mubarak, presidenti i Egjiptit, dha dorëheqjen më 11 shkurt. Por mbetet e paqartë se çfarë do të bëjë ushtriatani ka në dorë pushtetin.

Këshilli Suprem Ushtarak, forumi që shfronësoi Mubarakun, po përpiqet për t’i qartësuar gjërat komunikatë pas komunikate. Kësaj jave ka lëshuar dy të tilla. E para, komunikata numër 5, u mor me çështjen e qeverisjes. Ndërkohë që Kushtetuta është shfuqizuar dhe të dyja dhomat e Parlamentit janë shpërndarë, kabineti aktual-i kryesuar nga ish-shefi i forcave ajrore, Ahmed Shafiq-do të vazhdojë ta drejtojë vendin. Me tagrin e tij si kreu i Këshillit Ushtarak, ministri i Mbrojtjes, Muhamed Tantawi, dhe kolegët e tij do të vazhdojnë të udhëheqin me dekrete, ndërsa amendamentet e Kushtetutës po përgatiten (ato do të paraqiten për referendum popullor pas dy muajsh) derikur zgjedhjet e reja të mbahen, brenda 6 muajve.

Detaje të tjera po dalin në dritë me ngadalë. Një komitet i ngarkuar me shqyrtimin e Kushtetutës është emëruar dhe drejtohet nga një akademik prominent, Tariq al-Bishri. Z. al-Bishri, i përshkruar ndonjëherë si mendimtar islamik, është një figurë gjerësisht e respektuar; thirrja e tij për mosbindje civile disa vjet më parë frymëzoi protestuesit. Ai do punojë përkrah ekspertëve të tjerë konstitucionalistë dhe për habi edhe një ish-parlamentar nga Vllaznia Muslimane.

Më pak e qartë është se çfarë do të ndodhë me kabinetin aktual. Disa ministra janë shumë jopopullorë; edhe nëpunësit e tyre kërkojnë që ata të largohen. Edha ca koka të tjera duket se do të bien, jo vetëm nëpër ministri, por edhe ndërmjet menaxherëve të kompanive shtetërore, përshirë banka, kompani sigurimesh dhe fabrika. Një spastrim i ngjashëm ka filluar ndërmjet drejtueseve të sigurisë në Kajro. Kjo mund të përhapet edhe te guvernatorët që kontrollojnë 29 provincat e Egjiptit.

Kjo ka ardhur si rezultat i një vale grevash që kanë filluar në mbarë vendin, duke ndërthurur ethet revolucionare me shqetësime më praktike: rritje rrogash dhe kthimi i kontratave të përkohshme në të përhershme. Shumë kërkojnë që bosët e afërt me regjimin e dikurshëm të largohen. Ushtria është përpushur para grevave dhe komunikata e gjashtë u ka kërkuar protestuesve të kthehen në punë. Por trazirat duket se do të vazhdojnë dhe ushtria-e mbetur hollë pas kolapsit të forcave të sigurisë civile-nuk ka se çfarë të bëjë.

Ndërkohë ushtria ka filluar të kërkojë ndihma nga forcat opozitare, kryesisht nga protestuesit e rinj që pushtuan sheshin Tahrir për 18 ditë. Anëtarë të këtij grupi u takuan me dy gjeneralë, të cilët shiheshin si simpatizantë të shqetësimeve të tyre dhe u premtuan një tranzicion të butë drejt një qeverie civile, megjithëse dhanë shumë pak detaje. Ushtria tani për tani po bën përpara me një plan tranzitor pa shumë konsultime me forcat politike të Egjiptit. Ushtria dëshiron që Egjiptit t’i kthehet normaliteti dhe të zhduket në sfond dhe të lërë ministrat e ndërrueshëm të merren me opozitën dhe kërkesat e publikut.

Duke hedhur sytë përreth në Lindjen e Mesme, egjiptianët mund të pyesin nëse revolucioni po përhapet. Algjeria, Bahreini dhe Jemeni kanë parë protesta që janë shtypur me dhunë ndërkohë. Të tjera janë premtuar. Aktivistë në Libi e kanë shpallur të enjten “ditën e tyre të zemërimit”, ndërsa në Marok një fushatë për reforma kushtetuese dhe luftë kundër korrupsionit do të nisë në fund të kësaj jave.
Shtuar më 16/02/2011, ora 15:11
Shkruani komentin tuaj!
Të fundit nga kjo kategori