Arrestohet vrasësi sadist që masakronte viktimat në Zvicër
Në dhjetor në 2015-ës, një student me prirje sadiste vrau 4 persona. Ai tani është arrestuar afër fshatit Ruppersëil, aty ku ndodhi njëri prej krimeve më tronditëse të historisë së re të Zvicrës.

Që nga fundi i dhjetorit të vitit të kaluar një vend kërkonte një vrasës: Zvicra kishte vënë në lëvizje pothuaj të gjitha mekanizmat e sigurisë për të arrestuar vrasësin e katër personave në fshatin Ruppersëil, i njohur në këtë vend për fabrikën e sheqerit, shkruan Telegraf.

Këtë të premte autoritetet lajmëruan se është gjetur se kush e kishte kryer krimin. Sipas të dhënave të policisë dhe prokurorisë së kantonit Aargau bëhet fjalë për një student 33- vjeçar, i cili banonte në Ruppersëil. Më 21 dhjetor 2015 ai kishte observuar shtëpinë e viktimave dhe përmes një mashtrimi ishte futur aty.
Në shtëpi ndodheshin nëna, dy djemtë e saj dhe e dashura e njërit prej djemve. Ndërkohë i dyshuari për krimin i kishte lidhur ata, ua kishte mbyllur gojën dhe ua kishte prerë qafën me thikë.

Më i riu i kësaj familjeje ishte keqpërdorur edhe seksualisht. Ky 13-vjeçar, siç shkruan gazeta “Tages Anzeiger”, ishte futbollist i talentuar. Ai luante për juniorët e ekipit “FC Aarau”.

Pas hetimeve të kryera mësohet se vrasësi i supozuar kishte trajnuar disa ekipe të juniorëve në kantonin Aargau, shkruan dialogplus. Prokuroria tani për tani është e bindur se motivet e dorasit kanë qenë seksuale dhe financiare.

Por, një ekspert i forenzikës për “Tages Anzeiger” ka deklaruar se ky shpjegim nuk mjafton. Bernd Borchard tha se, rrjedha e krimit tregon për një psikopat, i cili me brutalitet dhe gjakftohtësi dhe motive sadiste ua kishte marrë jetën 4 personave.

Në vendbanimin e të dyshuarit policia ka konfiskuar një çantë me mjete e vegla të njëjta që ishin përdorur gjatë vrasjes së katërfishtë. Policia është e bindur se me arrestimin e të dyshuarit janë evituar krime të tjera./Albeu.com/
Shtuar më 15/05/2016, ora 10:50

Shkruani komentin tuaj!
Të fundit nga kjo kategori