Alarmohet Vatikani, në botë më shumë myslimanë se katolikë
Albeu.com
Ajo që prej kohësh ka tmerruar Vatikanin ka ndodhur: sipas një instituti studimesh në Shtetet e Bashkuara të Amerikës (World Christian Database), ndjekësit e islamit janë më të shumtë në numër se disa dhjetëra milionë katolikë.Janë këto të dhëna të vitit 2005, pra të dy viteve më parë, e si pasojë gjendja mund të jetë rënduar akoma më tej. Lajmi vjen nga "World Christian Database" (baza e të dhënave të botës kristiane), një ent amerikan i specializuar në studimin e tendencave fetare që flet për ekzistencën e 1 miliard e 322 milionë myslimanëve në botë. Sipas statistikave të Vatikanit, ndjekësit e Kishës së Romës kanë kaluar në periudhën nga viti 2000-2005 nga 1 miliard e 45 milionë në rreth 1 miliard e 115 milionë, me një rritje prej 6.7 për qindësh. Edhe nëse do të ndanim shifrat e ndjekësve të Profetit Muhamed, duke pasur parasysh dy rrymat kryesore, sunitët dhe shiitët, shihet se vetëm sunitët, me 1 miliard e 152 milionë besimtarë, do të klasifikoheshin si besimi më i ndjekur. Shiitët, në total, janë rreth 170 milionë, të përqendruar më së shumti në Iran. Por, duhet theksuar se të krishterët, në totalin e rrymave në të cilat ndahen, mbeten shumicë. Instituti Amerikan numëron dy miliardë e 153 milionë të krishterë. Më pas, në klasifikim vijnë hindutë, ata që nuk kanë asnjë fe, budistët dhe ndjekësit e të ashtuquajturave fe të reja. Kohët e fundit, Vatikani, në fakt, është shqetësuar në lidhje me atë që e quan largim të të krishterëve nga kisha dhe shifrat e publikuara së fundmi, dëshmojnë më së miri se ky shqetësim ka baza. Ajo çka vihet re, sipas zyrtarëve të Vatikanit, është fakti se në një kohë kur gjithnjë e më shumë besimtarë të krishterë po braktisin radhët e kishës, shumë e shumë njerëz të tjerë po konvertohen në myslimanë.
Shtuar më 21/05/2007, ora 11:07
Tage: arkiv
Shkruani komentin tuaj!
Të fundit nga kjo kategori