Korporata Energjetike e Kosovës po i injoron vendimet e Organit Shqyrtues të Prokurimit. Për këtë, OSHP’ja e urdhëroi Korporatën që t’i zbatojë vendimet e lëshuara për të, ndryshe e pret gjoba prej 5 mijë eurosh dhe i kërkoi menaxhmentit masa disiplinore për zyrtarët përgjegjës.

Korporata Energjetike e Kosovës është duke shkelur ligjin pasi nuk po i zbaton vendimet e gjykatës së tenderëve.
Organi Shqyrtues i Prokurimit ka dalë me një urdhëresë për Korporatën, përmes së cilës kërkon që KEK’u t’i zbatojë vendimet e saj, përndryshe e pret gjoba prej pesë mijë eurosh. Përveç gjobës, në Korporatë mund ta pësojë edhe zyrtari përgjegjës i prokurimit, i cili rrezikon të humbë licencën e prokurimit, raporton Express.

Ndërkaq, menaxhmentit të KEK’ut i ka kërkuar që të marrë edhe masa disiplinore ndaj personave përgjegjës për moszbatimin e vendimit.

Deri këtu puna kishte ardhur, pasi Korporata në tenderin për furnizim me shirita gome, kishte bërë shkelje të Ligjit të Prokurimit Publik, në momentin kur kishte shpërblyer me kontratë kompaninë “New KO Ballkan”. Për shkak të këtyre shkeljeve, OSHP’ja kishte marrë vendim që tenderin e Korporatës për furnizim me shirita gome, ta kthejë në rivlerësim. /albeu.com/